Rev 20 | KMG | STEP | Eme no sambâŋkonec aŋelo moczi wahame honepo. E hârâcte ki â kâpâcwâru sâko moc bajuwec.

Revelation of John 20

Juku Sataŋ kâpâcwâru baniŋmu

1 Eme no sambâŋkonec aŋelo moczi wahame honepo. E hârâcte ki â kâpâcwâru sâko moc bajuwec. 2 Erâ e oâ, homa raŋɋa, demoŋ micne Sataŋ hâcne, e rorâ kâpâcwâruzi bândeŋnerâ jara 1 tauseŋ niŋgiŋhec foocte mucnerâ 3 hârâcko tuŋkeme huwec. Hume motâcne kizi basanaŋkerâ sâfâzi bâbâzickewec. Eme ŋicne ŋicne maŋ bâsifuc mocwâc mi ejarehuc mâc fohame jara 1 tauseŋ taraocte mukicne. Tarame firuepie wefurâ dameŋ bembeŋne mac juocmu.

Ŋic bâbâni fahareniŋmu jaŋere dâŋ

4 Eme no eri ŋeŋe ŋerame honepo. Honehape ŋic fisirâ fainao ŋembiŋ jaŋe mumutara gie baniŋte mujarekicne. Eme Jesu mutaniŋkehuc Anuture dâŋ hâwicmâc bajuhapie upe-jeŋic qâtâcnekicne jaŋere maŋ qâqâtâc honec-jopapo, erâ qowi mimicne e jahacne â hawari-ticne dieŋzi mi hecnembiŋ â šâŋe qâreŋ-ticne mai-jeŋicko â mejeŋicko mi bajumbiŋ, jaŋere maŋ qâqâtâc mâmâc honec-jopapo. Eme ŋic i jaŋe sahac-jeŋic ɋâreme honec-jopapo. Eme jaŋe Kristohec ŋicwofuŋ gie bahapie jara 1 tauseŋ tarawec. 5 Hâmokicne gâcne sâko jaŋe ine mi ɋârehuc jara 1 tauseŋ taraocte irec woŋec fombiŋ. Fafahare honepo i fafahare namba wâŋ. 6 Fafahare namba wâŋko šuhuckeŋgopieŋ jaŋe šeri bubiaŋ faio tiri juŋgopieŋ. Ŋic iŋucne hâmoc namba tuzi bâsowariec-jopaocmu. Jaŋe Anuture â Kristore taha bapafâc erâ juniŋmu, ehuc ehec ŋicwofuŋ gie bahuc juhapie jara 1 tauseŋ taraocmu.

Sataŋ kâpâcwâru fickonec wefurâ ŋic mocwâc maŋ bâsifuc ejareocmu

7 Eme jara 1 tauseŋ tarame Sataŋ firuepie kâpâcwâru fickonec mocwâc wefuocmu. 8 Wefurâ ŋicne ŋicne mâreŋ ŋifec â ŋifec, faic â juwic juŋgopieŋ maŋjeŋic bâsifuckerâ Gogo â Magogo ŋic qafeŋ-jopame râsi roroc erâ fisiniŋmu, jaŋe šare-jeŋic hâwec moŋgeŋ iŋucne, wowosene tâmiric. 9 Fisirâ mâreŋ wâneŋ sâko ira raferâ tiriŋic toma âterâ fohapie somâc-jopambiŋ. Somâc-jopahuc hae biaŋ i mâmâc orâŋkembiŋ. Iŋuc ehapie sambâŋkonec šoc waharâ šâhâmoc-jopa-fârewec. 10 Á Sataŋ, maŋ bâsifuc ejarehuc juwec, e lambe opâre riqiczi šoc šahuc foekac ira behepie huwec. Qowi mimicne â porofete-ticne burecne jahe ijaha mâmâc jupic. Eme jahe ira ŋafe šoaŋ qâqâtiri šâic fâro mana rahuc junicmu sanaŋ.

Ʒâhec fafahare â okac babazu

11 Eme no eri ŋeŋe kâcɋene qaŋqaŋ moc honepo. Fainao ŋewec ere maionec sambâŋ â mâreŋ wise tâmirepic. 12 Ehame hâmokicne fekicne wahakicne jaŋe mâmâc sasawa eri ŋeŋe fuŋnao domapie honec-jopapo. Domahapie papiane papiane qaratiembiŋ. Erâ moc qaratiembiŋ i juju sanaŋte papia. Eme hâmokicne jaŋe juju bapa-jeŋicte dâŋ papiao qâreŋkekicne i honehuc dâŋjeŋic mutarambiŋ. 13 Eme dameŋ ira hâweczi maŋnao hâmokicne fombiŋ jaŋe bârisiec-jopawec â hâmoczi ŋic hâmocne bârisiec-jopawec â hârâczi ŋic hâmocne bârisiec-jopawec wâc. Eme hâmokicne sasawa jaŋe ju ju bapa-jeŋicte fuŋne rituhuc tofa bazu-jarekicne. 14 Eme hâmoc â hârâc i šocriqicko behepie huwec. Izi hâmoc namba tu ekac, šocriqic hâcne. 15 Eme ŋic moc e šâŋene juju sanaŋte papiao basarâ šocriqicko behepie huwec.